A ke dalë nga një marrëdhënie toksike dhe, edhe pse ajo ka përfunduar, vazhdon të ndihesh sikur nuk je më i njëjti person? Ndoshta e pyet veten: “Pse nuk kam më vetëbesim?”, “A isha unë problemi?” ose “Pse e kam kaq të vështirë t’i besoj vetes?”
Nëse po kalon këtë fazë, dua të të them diçka që do ta thosha edhe në një seancë psikologjike: fakti që sot ndihesh i pasigurt nuk do të thotë se je bërë një person i dobët. Mund të jetë pasojë e asaj që ke përjetuar.
Një marrëdhënie toksike mund të dëmtojë vetëvlerësimin përmes kritikave të vazhdueshme, kontrollit, manipulimit emocional, gaslighting-ut dhe mungesës së mbështetjes. Kur këto përvoja përsëriten, njeriu mund të fillojë të dyshojë te perceptimet, aftësitë dhe vlera e tij.
1. Kupto se çfarë të ka ndodhur
Hapi i parë për të rikthyer vetëbesimin pas një marrëdhënieje toksike është të mos e fajësosh veten.
Nëse dikush të ka bërë vazhdimisht të ndihesh “shumë i ndjeshëm”, “i pavlerë”, “problematik” ose të ka bindur se gjithçka ishte faji yt, është normale që pas ndarjes të vazhdosh ta dëgjosh atë zë brenda vetes.
Por ai zë nuk është domosdoshmërisht zëri yt.
Pyete veten: “A është kjo mënyra si do t’i flisja një personi që dua?” Nëse përgjigjja është jo, fillo të ndryshosh mënyrën si i flet vetes.
2. Mos kërko më vlerën tënde te personi tjetër
Pas një marrëdhënieje toksike mund të lindë nevoja për miratim. Mund të mendosh: “A jam mjaftueshëm i mirë?”, “A më pëlqejnë?”, “A më duan?”
Vetëvlerësimi nuk duhet të varet nga përgjigjja e një personi tjetër.
Vetëvlerësimi lidhet me mënyrën se si e percepton veten, aftësitë, cilësitë dhe vlerën tënde si individ.
3. Vendos kufij të rinj
Shërimi emocional nuk do të thotë vetëm të harrosh ish-partnerin. Do të thotë të mësosh çfarë nuk do të pranosh më.
Një kufi mund të jetë: “Nuk pranoj të më flitet me mungesë respekti.”
Një tjetër mund të jetë: “Nuk kam pse të justifikoj çdo vendim që marr.”
Kufijtë personalë janë pjesë e rikthimit të respektit për veten.
4. Fillo t’i besosh përsëri vetes
Mos prit të ndihesh menjëherë i sigurt. Vetëbesimi rikthehet përmes veprimeve të vogla.
Mbaj një premtim që i ke bërë vetes. Merr një vendim pa kërkuar vazhdimisht miratimin e të tjerëve. Kujdesu për trupin tënd. Dil, tako njerëz që të bëjnë mirë dhe rikthehu te gjërat që të kanë dhënë më parë kënaqësi.
Marrëdhëniet pozitive dhe mbështetja sociale lidhen në mënyrë të ndërsjellë me zhvillimin e vetëvlerësimit.
5. Mos e mat shërimin me faktin nëse e mendon ende
Mund ta kujtosh një marrëdhënie toksike edhe pasi ke filluar të shërohesh. Mund të ndjesh mall, zemërim, trishtim ose konfuzion.
Kjo nuk do të thotë se duhet të kthehesh.
Shërimi emocional nuk është të harrosh atë që ndodhi. Është të arrish në një pikë ku ajo që ndodhi nuk përcakton më mënyrën se si e sheh veten.
Dhe nëse sot ndihesh i thyer, mos kërko të bëhesh menjëherë versioni i vjetër i vetes.
Ndërto një version të ri: më të vetëdijshëm, më të fortë dhe me kufij më të shëndetshëm.
Nëse pas një marrëdhënieje toksike vazhdon të përjetosh ankth të fortë, frikë, ndjenja të thella pavlefshmërie ose vështirësi të mëdha në marrëdhëniet e përditshme, biseda me një psikolog mund të të ndihmojë ta kuptosh përvojën dhe të rindërtosh gradualisht vetëbesimin.
