Kur familja zgjerohet me ardhjen e një bebeje të re në shtëpi, prindërit përjetojnë gëzim dhe emocione te forta.Për femijen me te madh kjo periudhë mund të sjellë pasiguri, xhelozi dhe konfuzion.
Shumë prindër fokusohen te përgatitja e dhomës, rrobat e bebit dhe gjërat praktike, por harrojnë pjesen me të rëndësishme: femija me i madh ka nevojë për përgatitje emocionale. Ai nuk ka nevojë vetëm të dijë se po vjen një bebe e re, por të ndihet i sigurt se vendi i tij në familje nuk po ndryshon.
Fëmija me i madh nuk ka frikë nga bebi, por nga ndryshimi
Kur vjen një bebe e re në familje, fëmija me i madh po përballet me një ndryshim të madh në botën e tij. Deri tani ka qenë qendra e vëmendjes, tani ai ndjen se diçka po ndryshon, edhe nëse nuk di ta shpjegojë.
Shpesh, ajo që prindërit e quajnë “xhelozi” është në të vërtetë frika e fëmijës për të mos humbur vëmendjen, afërsinë dhe sigurinë emocionale. Prandaj, përpara se të kërkoni sjellje të mirë, jepini siguri emocionale.
Flisni për bebin përpara se të vijë
Një nga mënyrat më të mira për të përgatitur fëmijën për ardhjen e një bebeje është ta përfshini që gjatë shtatzënisë. Flisni me të për bebin me gjuhë të thjeshtë dhe të ngrohtë. Tregojini se çfarë do të ndodhë, si do të ndryshojë rutina dhe çfarë do të thotë të bëhet motër ose vëlla i madh.
Përdorni fjali të buta si:
“Bebi do të jetë i vogël dhe do të ketë nevojë për shumë kujdes, por edhe ti je shumë i rëndësishëm për ne.”
Kjo e ndihmon fëmijën të kuptojë se ardhja e bebit ne shtepi nuk do të thotë humbje e vendit të tij në familje.
Mos i kërkoni të “rritet menjëherë”
Një gabim i zakonshëm që bëjnë prindërit pas ardhjes së bebit është t’i kërkojnë fëmijës tjeter të sillet “si i rritur”. Papritur i thuhet të presë, të kuptojë, të mos qajë, të mos bëhet xheloz.
Por ai është ende fëmijë. Edhe ai ka nevojë për përqafim, vëmendje dhe siguri. Kur familja zgjerohet, fëmija nuk ka nevojë të bëhet i fortë — ka nevojë të ndihet i sigurt.
Jepini rol, por jo barrë
Përfshijeni në mënyrë të butë. Kërkojini ndihmë të vogël: të sjellë pelenën, të zgjedhë një rrobë, të këndojë për bebin. Kjo e bën të ndihet pjesë e ndryshimit.
Por kujdes: mos e ngarkoni me përgjegjësi që nuk i takojnë. Fëmija nuk duhet të bëhet “ndihmës prindi”, por të ndihet ende fëmijë.
Ruani lidhjen me të
Edhe 10 minuta vetëm me të mund të bëjnë diferencë të madhe. Një përqafim, një bisedë para gjumit, një moment vetëm me mamin ose babin e ndihmon të ndiejë se ende ka vendin e tij.
Në fund, ardhja e një bebeje të re nuk është vetëm një ndryshim për familjen — është një ndryshim i madh emocional për fëmijën me te madh ne shtepi. Dhe mënyra si e përjeton ai këtë moment do të ndikojë te siguria e tij emocionale, te lidhja me bebin dhe te marrëdhënia me ju.
Kur familja zgjerohet, mos përgatitni vetëm shtëpinë për bebin.Përgatitni edhe zemrën e fëmijës që ishte aty i pari.
