A ju ndodh të jeni bashkë çdo ditë, por të flisni kryesisht për punën, ushqimet, faturat, familjen apo çfarë duhet të bëni nesër? Në terapi me çifte, shpesh shoh diçka shumë të zakonshme: dy njerëz mund të komunikojnë shumë, por të mos flasin më për atë që ndodh brenda tyre. Biseda ekziston, por lidhja emocionale fillon të dobësohet. Një marrëdhënie e shëndetshme nuk ka nevojë vetëm për dashuri. Ka nevojë edhe për komunikim në çift, dëgjim, besim, intimitet emocional dhe hapësirë për të shprehur nevojat dhe frikërat. Pyetjet e hapura dhe bisedat ku të dy partnerët dëgjojnë pa gjykuar mund të ndihmojnë në krijimin e më shumë afërsie. Nëse dëshironi ta njihni partnerin më thellë, mund të filloni me këto 10 tema.

1. Fëmijëria dhe përvojat që e kanë formuar

Pyeteni: “Cila është një përvojë nga fëmijëria që mendon se të ka bërë njeriun që je sot?” E kaluara ndikon në mënyrën se si një person e përjeton dashurinë, konfliktin, sigurinë dhe afërsinë. Të flisni për fëmijërinë nuk do të thotë të gjykoni prindërit apo të kërkoni fajtorë. Do të thotë të kuptoni më mirë partnerin.

2. Çfarë do të thotë dashuria për secilin prej jush?

Mos supozoni se partneri e përjeton dashurinë njësoj si ju. Pyeteni: “Kur ndihesh më i/e dashur nga unë?” Ndonjëherë njëri partner tregon dashuri përmes kujdesit, ndërsa tjetri ka nevojë për fjalë, kohë cilësore, përqafime ose vëmendje.

3. Frikërat që nuk i shpreh shpesh

Një pyetje shumë e rëndësishme është: “Cila është një frikë që e mban shpesh për vete?” Intimiteti emocional fillon kur ndihemi të sigurt për të treguar edhe pjesët tona të brishta. Vulnerabiliteti nuk është dobësi; në një marrëdhënie të sigurt mund të jetë mënyrë për të krijuar afërsi.

4. Çfarë të mungon në marrëdhënien tonë?

Kjo pyetje kërkon shumë maturi. Mos e bëni për të dëgjuar vetëm kritika. Bëjeni për të kuptuar. “A ka diçka që të mungon nga unë ose nga marrëdhënia jonë?” Në vend që të mbroheni menjëherë, përpiquni fillimisht të dëgjoni. Shpesh pas një ankese fshihet një nevojë emocionale.

5. Si dëshiron të të mbështes kur je keq?

Jo të gjithë njerëzit duan të njëjtën gjë kur janë të stresuar. Dikush dëshiron këshillë. Dikush tjetër dëshiron vetëm të dëgjohet dhe të përqafohet. Pyeteni: “Kur je i/e stresuar ose i/e trishtuar, çfarë ke më shumë nevojë nga unë?” Kjo pyetje mund të ndryshojë mënyrën se si e mbështesni njëri-tjetrin.

6. Konfliktet: Çfarë ndodh me ty kur grindemi?

Në çift nuk është e rëndësishme vetëm për çfarë grindeni, por edhe çfarë ndodh emocionalisht gjatë konfliktit. Pyeteni: “Kur grindemi, çfarë të lëndon më shumë?” Mund të zbuloni se pas zemërimit fshihet frika e refuzimit, ndjenja e mosvlerësimit ose frika se marrëdhënia po largohet.

7. Besimi dhe siguria emocionale

Pyeteni: “Çfarë të bën të ndihesh i/e sigurt në këtë marrëdhënie dhe çfarë ta cenon këtë siguri?” Besimi nuk ndërtohet vetëm duke shmangur tradhtinë. Ai lidhet edhe me sinqeritetin, qëndrueshmërinë, respektin dhe faktin që partneri ndihet i dëgjuar.

8. Intimiteti dhe afërsia

Intimiteti nuk është vetëm seksualiteti. Është edhe afërsia emocionale. Mund të pyesni: “Çfarë do të doje të bënim më shpesh vetëm për të ndier se jemi përsëri afër?” Kjo mund të hapë një bisedë për kohën së bashku, prekjen, seksualitetin, romantizmin dhe nevojat emocionale.

9. E ardhmja që dëshironi të ndërtoni

Një çift nuk duhet vetëm të jetojë të tashmen. Është e rëndësishme të flasë edhe për të ardhmen. “Si e imagjinon jetën tonë pas pesë vitesh?” Flisni për familjen, punën, shtëpinë, financat, udhëtimet, fëmijët, stilin e jetës dhe qëllimet personale.

10. Çfarë mund të bëj unë që marrëdhënia jonë të jetë më e mirë?

Kjo është një nga pyetjet më të fuqishme. Jo: “Çfarë nuk bëj mirë?” Por: “Çfarë mund të bëj më shumë që ti të ndihesh i/e dashur, i/e respektuar dhe i/e rëndësishëm për mua?” Në një marrëdhënie të shëndetshme, të dy partnerët duhet të jenë të gatshëm të reflektojnë dhe të ndryshojnë diçka.

Mos i bëni këto pyetje si një intervistë

Zgjidhni vetëm një ose dy tema. Fikni telefonin, uluni pranë njëri-tjetrit dhe dëgjoni përgjigjen deri në fund. Mos u përpiqni menjëherë të jepni zgjidhje. Mos e përdorni atë që partneri ju rrëfen më vonë kundër tij. Dhe mbi të gjitha, mos e ktheni bisedën në një debat për të provuar kush ka të drejtë. Në terapi, shpesh nuk është përgjigjja ajo që ndryshon marrëdhënien. Është mënyra se si dy njerëz e dëgjojnë njëri-tjetrin. Ndonjëherë një pyetje e sinqertë si “Si je vërtet me mua?” mund të hapë një derë që prej kohësh ka qenë e mbyllur. Sepse një marrëdhënie nuk mbahet gjallë vetëm duke qenë pranë. Mbahet gjallë duke vazhduar ta njohësh njeriun që ke pranë. Per me shume klikoni ketu